Tashkent qalasında 27-avgust kúni usı sıylıqlardı tapsırıw máresimi boldı.

Mámleketimiz basshısı bársheni, bárinen burın, Ǵárezsizlik bayramı menen qutlıqladı. Mámleketimizde erisilip atırǵan nátiyjelerdiń tiykarı, háreketlerdiń mánisine ayrıqsha toqtap ótti.

– Jańa Ózbekstanda artqa qaytpaytuǵın túrge engen reformalarımız qanday úlken nátiyjeler berip atırǵanın bárshemiz kórip turmız. Ótken segiz jılda jalpı ishki ónimimiz jedel pát penen ósip, 115 milliard dollarǵa jetti. Búgin bir sandı birinshi márte aytpaqshıman: Xalıqaralıq valyuta qorınıń prognozına bola, bıyıl ekonomikamızdıń kólemi 130 milliard dollardan artıwı kútilmekte. Yaǵnıy, aldın bunday ósiw, bunday joqarı tán alıw hesh qashan bolmaǵan, – dedi Shavkat Mirziyoev.

Bunday nátiyjelerge isbilermenlik keńnen qollap-quwatlanıp atırǵanı, zamanagóy sanaat kompleksleri qurılıp atırǵanı, “jasıl” hám innovaciyalıq ekonomikaǵa ótip, alternativ energiya derekleri jaratılıp atırǵanı, málimleme texnologiyaları, turizm hám qarjı texnologiyaları sıyaqlı xızmet kórsetiw tarmaqları rawajlandırılıp atırǵanı tiykar bolmaqta.

Elimizde zamanagóy qalalar boy tiklemekte, awıl hám máhálleler abat bolmaqta. Ótken segiz jılda xalıq ushın 500 mıńnan aslam kóp qabatlı turaq jaylar qurıldı. Bul ǵárezsizliktiń dáslepki 25 jılına salıstırǵanda tórt esege kóp. Máhálle infrastrukturasın jaqsılaw, awıllardı, jollardı abat etiw ushın 60 trillion sum qarjı jumsaldı. Yamasa, 155 milliard dollar investiciya esabınan 100 mıńnan aslam investiciyalıq joybarlar iske qosıldı, 7 millionnan aslam xalıq dáramatlı boldı.

– Bunday úlken tariyxıy jetiskenliklerimiz – óz waqtında tereń oylap alıp barǵan keń kólemli reformalarımız, eń áhmiyetlisi, adamlarımızdıń oy-pikiri, dúnyaǵa kózqarası ózgergeni nátiyjesi, desek, áyne haqıyqattı aytqan bolamız. Qurıp atırǵan imaratlarımız, zamanagóy kompleksler, qolaylı turaq jaylar, mektep hám baqshalar, medicina, mádeniyat hám sport orınları mısalında Jańa Ózbekstannıń ekonomikalıq qúdireti hám úlken dóretiwshilik potencialı ayqın kózge taslanbaqta. Tiykarǵısı, qaysı tarawda bolmasın, hár bir jetiskenlik hám nátiyje, bárinen burın, insan qádirin ulıǵlaw, onıń huqıqları menen máplerin támiyinlewge xızmet etpekte,-dedi mámleketimiz basshısı.

Sońǵı segiz jılda sociallıq infrastrukturaǵa aldınǵı jıllarǵa salıstırǵanda altı ese kóp qarjı qaratıldı. Nátiyjede baqsha orınları 720 mıńnan 2,5 millionǵa jetkerildi. 466 jańa mektep qurılıp, 1 millionǵa shamalas oqıwshı ornı jaratıldı. Studentler sanı 279 mıńnan 1,5 millionǵa shekem arttırılıp, joqarı bilimlendiriwde qamtıp alıw 40 procentke alıp shıǵıldı.

Ótken háptede Isbilermenler kúni múnásibeti menen 168 eń aldıńǵı biznes wákilleri, miynetkesh diyqan hám fermerler mámleketimizdiń joqarı sıylıqları menen sıylıqlanǵanı atap ótildi.

– Bunday pidayı watanlaslarımız, olardıń baslamaların qollap-quwatlaw hám xoshametlewden sharshamayman. Álbette, bul biykarǵa emes. Bársheńiz jaqsı bilesiz, bunnan on jıl aldın biz tiykarınan shiyki zat eksport etetuǵın edik. Házirgi kúnde bolsa, sanaat ónimleriniń kólemin 2016-jılǵı 28 milliardtan 62 milliard dollarǵa jetkerdik. Eger óz waqtında isbilermenlik ushın qolaylı sharayatlar jaratıp bermesek, bunday jetiskenliklerge erise alar ma edik? Joq, álbette, – dedi mámleketimiz basshısı.

Atap ótilgenindey, búgin biznes wákilleri ekonomikamızdıń haqıyqıy tayanıshına aylandı. Bir ǵana qurılıs tarawın alatuǵın bolsaq, bul baǵdar aldın hesh qashan házirgidey jedel rawajlanbaǵan. Burın qurılıslar tek ǵana mámleketlik buyırtpa tiykarında bolatuǵın edi. Búgin jeke menshik qurılıs kompaniyalarınıń sanı 30 mıńnan astı, qurılıs materialların islep shıǵarıw kólemi 6 milliard dollarǵa shamalastı. Házirgi kúnde Ózbekstan shın mánisinde úlken qurılıslar maydanına aylandı.

Tek ǵana ótken jıldıń ózinde 23 milliard dollarlıq qurılıs jumısları ámelge asırıldı. Bul 2016-jılǵa salıstırǵanda 4 esege kóp.
Bunday úlken ózgerislerdi awıl xojalıǵı, toqımashılıq, elektrotexnika, mashina qurılısı, farmacevtika sıyaqlı baǵdarlarda da kóriw múmkin.

Mámleketimizde tek ǵana sanaat penen sheklenip qalmastan, xızmet kórsetiw tarawların rawajlandırıwǵa da ayrıqsha itibar qaratılıp atırǵanı atap ótildi.

– Burın 500 million dollarǵa jetpegen turizm eksportı házir 3 milliard dollarlıq shegaradan astı. Jeti-segiz jıl aldın IT eksportı 1 milliard dollarǵa jetedi, dese, oǵan kim isener edi? Eń áhmiyetlisi, barlıq tarmaqlarǵa jańa ilim, zamanagóy texnologiyalar kirip keldi. Olarda júz mıńlaǵan jumıs orınları hám joqarı maman kadrlar armiyası payda boldı. Hár bir tarawda Jańa Ózbekstannıń óz strategiyası, tájiriybe mektebi qáliplesti.

Mámleketimizdiń mine, usınday jańa tariyxın, jańa kelbetin jaratıwda pútkil xalqımız qatarında siz, ázizlerdiń de múnásip úlesińiz bar hám bunıń ushın bársheńizge tereń minnetdarshılıq bildiremen, – dedi Shavkat Mirziyoev.

Prezident orınlarda mámleketlik sıylıqlardı qabıl etip atırǵan watanlaslarımızdı da qutlıqladı.

Bunnan soń, sıylıqlanǵanlarǵa húrmetli ataq, orden hám medallar saltanatlı túrde tapsırıldı.

– Milliy ǵárezsizligimizdiń eń ullı maqseti insanǵa itibar, onıń qádirin, miynetin ulıǵlaw, ullı xalqımızdıń izzet-húrmetin ornına qoyıwdan ibarat. Bunı usı minutlarda bárshemiz jáne de tereń sezinbektemiz. Óz miynetińiz benen mine usınday húrmetke erisiw, el-jurt itibarında bolıwday ullı baxıt sizlerdi hesh qashan tárk etpesin, – dedi Prezident.

Sıylıqlanǵanlar joqarı itibar ushın minnetdarshılıq bildirip, xalqımızǵa jaqsı tilekler bildirdi.