Húrmetli delegaciyalar basshıları!

Bárinen burın, Qıtay Xalıq Respublikasınıń Baslıǵı, húrmetli Si Czinpin Mırzaǵa májilisimizdi joqarı dárejede shólkemlestirgeni hám qızǵın qabıllaǵanı ushın shın júrekten minnetdarshılıq bildiremen.

Sonday-aq, barlıq qatnasıwshılardı xalıqlarımız úlken úles qosqan Ekinshi jer júzilik urısta erisilgen ullı Jeńistiń 80 jıllıǵı múnásibeti menen qutlıqlawǵa ruqsat etkeysiz.

Qırǵız Respublikasınıń Ǵárezsizlik kúni múnásibeti menen húrmetli Prezidenti Sadir Nurǵojaevich Japarovqa bildirilgen qutlıqlawlarǵa qosılaman hám Ózbekstannıń eń ullı hám tiykarǵı mámleketlik bayramı múnásibeti menen aytılǵan jıllı sózlerińiz ushın mitnnetdarshılıq bildiremen.

Húrmetli sammit qatnasıwshıları!

Biziń ushırasıwımız Qıtaydıń eski mádeniyatı hám onıń sanaat hám texnologiyalıq baǵdarındaǵı jedel rawajlanıwı arasındaǵı úyleslikti ózinde kórsetken Tyanczin qalasında bolıp ótpekte.

Bul jerde ullı Konfuciydiń “Ómirde óz orınńdı tabıwdı qáler ekensen, basqalarǵa járdem ber, tabısqa umtılar ekensen, basqalardıń jetiskenligine járdem ber” degen hikmetli sózleri ózgeshe ruwxta jańlaydı.

Bul mıń jıllıq filosofiya óz-ara húrmet hám bir-birin qollap-quwatlaw, hár bir aǵza mámlekettiń máplerin esapqa alıw principlerine tiykarlanǵan Shanxay birge islesiw shólkeminiń búgingi missiyasına únles bolıp esaplanadı.

ShBSh mákanında ulıwma rawajlanıw hám abadanlıq mine usınday bekkem tiykar ústinde qurılıp atır, dep esaplayman.
Qıtaydıń nátiyjeli basshılıǵı sebepli Shólkemimizdiń abırayı jáne de bekkemlendi, mámleketlerimizdiń óz-ara paydalı ámeliy birge islesiwi keńeydi.

Ótip atırǵan bul sammit jańa tariyxıy dáwirdi baslap beretuǵınına hám óz-ara qatnasıqlardıń uzaq perspektivaǵa mólsherlengen strategiyalıq baǵdarların belgilep alıwǵa xızmet etetuǵınına isenemen.

Húrmetli kásiplesler!

Ekonomikalıq, intellektuallıq, resurs hám texnologiyalıq baǵdarlarda úlken potencialǵa iye bolǵan Shanxay birge islesiw shólkemi xalıqaralıq maydanda óz tásirin izbe-iz keńeytip barmaqta. Global anıqsızlıq baqlanıp atırǵan házirgi sharayatta bul ayrıqsha áhmiyetke iye bolıp esaplanadı.

Isenimniń sistemalı krizisi, kelispewshiliklerdiń keńeyip atırǵanı, kóp tárepleme institutlardıń ázzileniwi hám dúnya sawda sistemasınıń bóliniwi xalıqaralıq qáwipsizlik hám turaqlılıq arxitekturası tiykarlarına zıyan jetkermekte. Bunday sharayatta ShBSh mámleketleriniń bir-birin óz-ara túsiniwi hám awızbirshiligi – bul tek bahalı baylıq emes, al biziń sheksiz regionımızda tınıshlıqtı saqlawdıń gilti bolıp esaplanadı.

Ásirese, ShBSh teń huqıqlı sóylesiw, óz-ara húrmet hám sheriklik mákanı bolıp qalıp atırǵanı áhmiyetli. Mine, usı tárepi mápler teńsalmaqlılıǵın támiyinlew hám zamanımızdıń eń quramalı qáwip-qáterlerine birgelikte juwap tabıw imkaniyatın bermekte.

ShBShnıń hawazı biziń ulıwma siyasiy erk-ıqrarımızdıń kórinisi, tınısh keleshek hám turaqlı rawajlanıw jolındaǵı isenimli háreketlerge shaqırıwımız sıpatında jáne de isenimli hám bálent hawazda jańlawı kerek, dep esaplaymız.

Kóp tárepleme birge islesiwdi jáne de tereńlestiriw boyınsha óz kózqaraslarımız benen ortaqlasıwdı qáler edim.

Bárinen burın, Shólkemniń nátiyjeliligin arttırıw, onıń institutları hám qararların ámelge asırıw mexanizmlerin bekkemlew zárúr. Shólkemdi transformaciyalaw boyınsha Samarqand sammitinde baslanǵan processler usı áhmiyetli wazıypalardı sheshiwge járdem beredi, dep isenemen.

Biz Shólkemniń izbe-iz keńeyiwiniń tárepdarımız. Sebebi “ShBSh modeli”niń tabısı onıń ashıq-aydınlıǵı hám keń kólemli birge islesiwge qaratılǵanında bolıp tabıladı. Biz óz keleshegin ShBSh menen baylanıslı kórip atırǵan mámleketlerdiń umtılısların qollap-quwatlawǵa tayarmız.

ShBShnıń sóylesiw boyınsha sherikleriniń quramı, sonıń ishinde, basqa region mámleketleri esabınan keńeyip atırǵanı Shólkemdi Global Qubla mámleketleri menen birge islesiw platformasına aylandırıwǵa járdem beredi.

Qáwipsizlik tarawındaǵı birge islesiw – ShBShnıń sheshiwshi tiykarǵı baǵdarlarınan biri. Búgingi kúnde kelisilgen kózqaraslarǵa jáne isenim hám qáwipsizlikti támiyinlewdiń jańa mexanizmlerine talap kúsheyip barmaqta.

Yadrolıq qáwipsizlik jolında kóp tárepleme sheriklikti bekkemlew boyınsha ShBSh deklaraciyasın qabıl etiw waqtı keldi, dep esaplaymız. Bul deklaraciya tınıshlıq jolındaǵı atomdı rawajlandırıw hám ayrıqsha jaǵdaylarǵa juwap beriwdiń bekkem tiykarına aylanadı, Birlesken Milletler Shólkeminiń qáwenderligindegi tarqatpaw globallıq rejimine múnásip úles boladı.

Terrorizm hám ekstremizmniń tábiyatı sezilerli dárejede ózgerip atırǵanı, kiberjınayatshılıq, sintetikalıq narkotikler islep shıǵarıw hám aylanısınıń ósip atırǵanı, shólkemlesken jınayatshılıqtıń kúsheyip atırǵanı múnásibeti menen bildirilip atırǵan qáweterlerge qosılamız.

Usı qáwiplerge qarsı nátiyjeli gúresiw maqsetinde Ishki isler hám Jámiyetlik qáwipsizlik ministrleri keńesiniń jumısın qayta tiklew, Jınayatshılıqqa qarsı gúresiwde birge islesiw haqqındaǵı kelisimdi qayta kórip shıǵıw, Náshebentlikke ǵárezli bolıp qalıwǵa qarsı gúrseiwdiń 2030-jılǵa shekem mólsherlengen baǵdarlamanı islep shıǵıwdı usınıs etemiz.

“ShBSh – Awǵanstan” sóylesiw toparınıń jumısı qayta tikleniwin qollap-quwatlaymız. Konstruktivlik sóylesiwlerdi rawajlandırıw hám Awǵanstandaǵı sociallıq-ekonomikalıq joybarlardı qollap-quwatlaw boyınsha usınıslardı islep shıǵıw onıń tiykarǵı wazıypalarınan biri bolıwı múmkin.

Húrmetli delegaciyalar basshıları!

Dúnya ekonomikasında baqlanıp atırǵan házirgi tendenciyalardı esapqa alıp, sawda-ekonomikalıq birge islesiwdi keńeytiwge tiykarǵı áhmiyet qaratamız.

Biz keń regionımızda ekonomikalıq birge islesiwdiń turaqlı modellerin qáliplestiriw tárepdarımız.

ShBSh mákanında regionallıq ishki ónim almasıw kólemin arttırıwǵa túrtki beretuǵın Sawdanı ápiwayıllastırıw tártip-qaǵıydaları haqqındaǵı kelisimge qol qoyılıwın áhmiyetli wazıypa, dep esaplaymız.

Isenimli óndiris-logistika shınjırların rawajlandırıw hám óz-ara investiciyalardı xoshametlew zárúr ekenligin atap ótpekshimen.
Usı múnásibet penen ShBSh sheńberinde minerallardı qazıp alıw hám tereń qayta islewde aldınǵı texnologiyalardı engiziw maqsetinde Strategiyalıq materiallar boyınsha ShBSh regionallıq orayı, mámleketlerimizde muwapıqlastırılǵan siyasat alıp barıw hám “jasıl” energetikanı jedel rawajlandırıw ushın ShBSh Energetika konsorciumı, startap hám innovaciyalıq joybarlardı qollap-quwatlaw hám alǵa qoyıw ushın Venchur kompaniyaları hám qorları tarmaǵı, mámleketlerimiz regionların tartqan halda, biznes boyınsha sóylesiwlerdi jolǵa qoyıw hám investiciyalardı alǵa qoyıw ushın Arnawlı elektron portal sıyaqlı bir qatar jańa kóp tárepleme platformalar hám kooperaciyanı qollap-quwatlaw quralların shólkemlestiriwdi usınıs etemen.

Regionallıq sanaat hám infrastruktura joybarların qarjılay qollap-quwatlawdıń nátiyjeli quralların tezirek engiziw áhmiyetli. Bul máseleni wákillikli ministrler dárejesinde jáne bir márte kórip shıǵıwdı usınıs etemiz.

Arqa – Qubla hám Shıǵıs – Batıs jónelisleri boyınsha transport-tranzit potencialın tolıq iske qosıw ellerimizdiń ulıwma máplerine juwap beredi.

Oraylıq Aziya arqalı Persiya qoltıǵı hám Hind okeanı portlarına shıǵatuǵın qubla jónelistegi koridorlardı rawajlandırıw ayrıqsha áhmiyetke iye bolmaqta.

Biz “ShBSh birden-bir transport mákanı”n qáliplestiriw hám onı “Bir mákan – bir jol” strategiyalıq baslaması menen baylanıstırıw boyınsha háreketlerdi muwapıqlastırıw ushın úlken imkaniyatlardı kórmektemiz. Bul jańa multimodal tarmaqlar, sanlı platformalar hám “jasıl” koridorlar jaratıwdı názerde tutadı. Bul baǵdarda tiyisli kóp tárepleme koncepciyanı islep shıǵıwdı usınıs etemiz.

Jáne bir tiykarǵı baǵdar – ShBShnıń “jasıl” transformaciya tarawındaǵı birge islesiwin keńeytiw. Qıtay tárepiniń baslaması menen “Jasıl” sanaat tarawında birge islesiw haqqındaǵı bildiriw óz waqtında qabıl etilmekte, dep esaplayman.

Sonday-aq, klimat ózgeriwine beyimlesiw, hawaǵa záhárli gazler shıǵarılıwın azaytıw, ekologiyalıq qáwip-qáterlerdi boljaw ushın jasalma intellekt texnologiyaların engiziw máseleleri boyınsha regionallıq platformanı iske qosıw zárúr.

Mádeniy qatnasıqlardı jáne de tereńlestiriw hám xalıq diplomatiyası institutın kúsheytiw ShBSh sheńberindegi uzaq múddetli sherikliktiń áhmiyetli faktorı esaplanadı.

Xalıq dóretiwshiligi xalıqaralıq festivalların ótkeriw, “ShBSh universiteti” sheriklik tarmaǵınıń onlayn kampusın jaratıw, innovaciyalıq baǵdarlar boyınsha hár jılı studentler hám jas qánigeler arasında tańlaw hám olimpiadalar shólkemlestiriw gumanitarlıq almasıwlardı rawajlandırıw hám xalıqlarımızdı jáne de jaqınlastırıwǵa kúshli túrtki beriwi múmkin.

Bunnan tısqarı, “Turistlik koridor” hám ShBSh medicinalıq turizm alyansın iske qosıw sıyaqlı perspektivalı joybarlardı islep shıǵıwdı usınıs etemiz.

Húrmetli kásiplesler!

Pursattan paydalanıp, Qırǵızstan Shanxay birge islesiw shólkemine basshılıqtı qabıl etip alǵanı múnásibeti menen Sadir Nurǵojaevichti qutlıqlap, Sizge bul baǵdarda úlken tabıslar tileymen.

Sózimniń juwmaǵında búgin qabıl etilip atırǵan Tyanczin deklaraciyası, ShBShnı 2035-jılǵa shekem rawajlandırıw strategiyası hám basqa da juwmaqlawshı hújjetler kóp tárepleme birge islesiwimizdi keńeytiw hám zamanagóy qáwip-qáterlerge nátiyjeli sheshimler tabıwda áhmiyetli tiykar bolıp xızmet etetuǵınına isenim bildiremen.

Biz ShBSh sheńberinde doslıq, jaqsı qońsıshılıq hám óz-ara paydalı birge islesiwdi bekkemlew baǵdarındaǵı ulıwma wazıpalardı sheshiw ushın jumıslardı birgelikte dawam ettiriwge tayarmız.

Itibarıńız ushın raxmet.