Ўзбекистон Республикаси Иқтисодиёт ва молия вазирлиги

Профессор Сакс ўз маърузасида глобал миқёсда БРМ (SDG)ларга эришишдаги долзарб чақириқлар, Ўзбекистоннинг бу борадаги саъй-ҳаракатлари ҳамда ҳудудий мониторинг тизимларининг аҳамияти ҳақида тўхталиб ўтди. У Ўзбекистон томонидан Барқарор ривожланиш мақсадларига эришиш йўлида амалга оширилаётган ишларга ижобий баҳо берди ва халқаро ҳамкорликни янада кучайтириш зарурлигини таъкидлади.

Тадбирда, шунингдек, Иқтисодиёт ва молия вазири ўринбосари Умид Абидхожаев, AFD директори ўринбосари Антуан Шевалие, БМТнинг Ўзбекистондаги доимий координатори Сабин Махл ҳамда давлат идоралари, илмий доиралар ва халқаро ташкилотлар вакиллари иштирок этдилар.

Семинар доирасида иштирокчиларга БРМнинг мазмун-моҳияти ва Ўзбекистоннинг сўнгги йиллардаги ютуқлари ҳақида батафсил маълумот берилди. Жумладан, Ўзбекистон умумий БРМ индекси бўйича жаҳон рейтингининг 62-ўрнида қайд этилган бўлиб, мамлакатнинг ўртача кўрсаткичи 73,1 баллни ташкил этмоқда. Ушбу кўрсаткич минтақанинг ўртача даражаси (72,0)дан юқори бўлиб, 2015 йилдан буён +12,1 баллга ўсиш кузатилган.

Тадбир доирасида БРМни мониторинг қилиш платформаларини ишлаб чиқиш, геомаълумотлар ва замонавий статистик воситаларни жорий этиш, озиқ-овқат хавфсизлиги ҳамда ер ресурсларидан фойдаланиш йўналишларида ҳамкорлик масалалари муҳокама қилинди.

Профессор Сакс ва Франция Тараққиёт агентлиги билан биргаликда Барқарор ривожланиш мақсадларини ҳудудлар даражасида мониторинг қилишни йўлга қўйиш бўйича қўшма лойиҳани амалга ошириш мақсадида ҳамкорлик меморандуми имзоланди.

Ўзбекистон Республикаси Иқтисодиёт ва молия вазирлиги мазкур ҳамкорликни мамлакатимизнинг барқарор ва инклюзив ривожланиш йўлидаги муҳим қадам сифатида эътироф этади ҳамда ушбу йўналишда халқаро ҳамкорликни янада мустаҳкамлашга тайёр эканлигини билдиради.

Иқтисодиёт ва молия вазирлиги
Ахборот хизмати