Наманган вилояти Ички ишлар бошқармасида Мустақиллигимизнинг 34 йиллиги муносабати билан «Ватан учун, миллат учун, халқ учун!» шиори остида тантанали байрам тадбири бўлиб ўтди
2025-08-31 09:00:00 / Янгиликлар
Тадбирда бошқарма раҳбарияти, фахрийлар ҳамда ҳудудий ва соҳавий хизматлар бошлиқлари иштирок этди.
Давлат мадҳияси садолари остида бошланган тантанада дастлаб вилоят ИИБ бошлиғи шахсий таркибга Ички ишлар вазирининг байрам табригини ўқиб эшиттирди.
Табрик нутқидан сўнг, Ватанимиз тинчлиги ва эл-юрт осойишталигини таъминлаш йўлидаги кўп йиллик фидокорона хизматлари, жиноятчиликка қарши курашиш ва уни олдини олишдаги самарали меҳнатлари, шунингдек, хизмат бурчини бажаришда кўрсатган мардлик ва жасорати учун Ички ишлар вазирининг буйруғига асосан бир гуруҳ ходимлар мукофотланди.
Улар орасида «Аъло хизматлари учун» кўкрак нишони, «Ички ишлар органларида бенуқсон хизматлари учун» I, II ва III даражали кўкрак нишонлари, муддатидан олдин махсус унвонлар, Ички ишлар вазирининг эсдалик қўл соати, китоблар тўплами, пул мукофотлари, шунингдек, бошқарма бошлиғининг эсдалик қўл соати ва ташаккурномалари тантанали равишда топширилди.
Тадбир якунида бошқарма бошлиғи барча шахсий таркибни ва мукофотланганларни яна бир бор табриклаб, ушбу эътирофлар ходимларнинг келгуси хизматларини янада шижоат билан давом эттиришларига катта туртки бўлишини алоҳида таъкидлади.
Байрам тадбирлари шаҳар ва туманлар миқёсида ҳам давом эттирилмоқда.
Наманган вилояти ИИБ Ахборот хизмати