Shavkat Miromonovich Mirziyoev 1957-jıl 24-iyulde Jizzaq wálayatınıń Zamin rayonında shıpaker shańaraǵında tuwıldı. Milleti ózbek. Maǵlıwmatı - joqarı, 1981-jılı Tashkent irrigaciya hám awıl xojalıǵın mexanizaciyalaw injenerleri institutın injener-mexanik qánigeligi boyınsha tamamlaǵan. Texnika ilimleriniń kandidatı, docent. 

Miynet jolın 1981-jılı Tashkent irrigaciya hám awıl xojalıǵın mexanizaciyalaw injenerleri institutında kishi ilimiy xızmetker, aǵa oqıtıwshı, docent, oqıw isleri boyınsha prorektor lawazımlarında islegen.

1990-jılı respublika Joqarǵı Sovetiniń deputatı etip saylandı, Mandat komissiyasınıń baslıǵı boldı.

1992-jılı Tashkent qalasınıń Mırza Ulıǵbek rayonı hákimi lawazımına tayınlandı. 1996-2001-jılları Jizzaq wálayatı hákimi, 2001-2003-jılları Samarqand wálayatı hákimi lawazımlarında islep, usı rayon hám wálayatlardı sociallıq-ekonomikalıq jaqtan rawajlandırıwǵa úlken úles qostı.

Atqarıw hákimiyatındaǵı iskerligi menen bir waqıtta 1995-2003-jıllarda Ózbekstan Respublikası Oliy Majlisiniń deputatı sıpatında da mámleketti siyasiy, sociallıq-ekonomikalıq rawajlandırıw hám demokratiyalıq reformalardı ámelge asırıw baǵdarındaǵı áhmiyetli nızam hújjetlerin islep shıǵıw hám qabıl etiw procesinde belsene qatnasıp, nátiyjeli jumıs alıp bardı.

Sh.M.Mirziyoev 2003-jılı Ózbekstan Respublikasınıń Bas ministri etip tastıyıqlandı hám bul lawazımǵa jáne úsh márte - 2005, 2010, 2015-jıllarda Oliy Majlis palataları tárepinen qayta tastıyıqlandı.

Sh.M.Mirziyoev elimiz ǵárezsizlikke erisken dáslepki jıllardan baslap Ózbekstan Respublikasınıń Birinshi Prezidenti Islam Kárimovtıń joqarı isenimine erisip, onıń jaqın saplası hám pikirlesi sıpatında nátiyjeli jumıs alıp barmaqta.

Sh.M.Mirziyoev Húkimet basshısı sıpatında keń kólemli sociallıq-ekonomikalıq reformalardı ámelge asırıw, mámleketimizdi modernizaciyalaw hám jańalaw, iri hám siyrek ushırasatuǵın joybarlardı turmısqa engiziw, jeke menshikti ústin dárejede rawajlandırıw, ekonomikada kishi biznes hám jeke menshik isbilermenliktiń úlesin keskin arttırıw jáne olardıń huqıqıy qorǵalıwın bunnan bılay da bekkemlewde óziniń joqarı potencialı hám sheber shólkemlestiriwshilik qábiletin kórsetti.
Mámleket ekonomikasın industrial rawajlandırıw, respublikanıń eksport potencialın arttırıw, agrar tarawdı túp-tiykarınan reformalaw, ásirese, fermerlik háreketin rawajlandırıw, awıl xojalıǵı ónimlerin tereń qayta islew, respublikada azıq-awqat qáwipsizligin támiyinlew hám xalıqtı kepillengen hám arzan ónimler menen támiyinlew jumıslarına tiykarǵı dárejede itibar qarattı.

Jurtımızdıń barlıq aymaqlarında úlken dóretiwshilik hám abadanlastırıw jumısların alıp barıw, xalıqqa sapalı kommunallıq xızmet kórsetiw, respublikanıń qala hám rayonların, ásirese, alıs awıllıq rayonların kompleksli rawajlandırıw arqalı xalıqtıń turmıs hám miynet sharayatın túp-tiykarınan jaqsılawǵa qaratılǵan keń kólemli hám nátiyjeli ilajlardı ámelge asırdı.

Sh.M.Mirziyoevtiń iskerliginde sociallıq-ekonomikalıq máseleler menen bir qatarda bilimlendiriw, ilim, densawlıqtı saqlaw sistemaların zamanagóy talaplar tiykarında rawajlandırıw, jaslardıń salamat hám bárkamal bolıp kamalǵa keliwi ushın múnásip sharayatlar jaratıw, analıq hám balalıqtı kúshli qorǵaw tiykarǵı wazıypa sıpatında áhmiyetli orın iyeledi.

Ózin-ózi basqarıwdıń ayrıqsha institutı bolǵan mákannıń abırayın jáne de arttırıw, sonday-aq, basqa da jámiyetlik shólkemlerdi demokratiyalıq reformalarǵa keńnen tartıw arqalı jámiyette olardıń abırayın bekkemlew, milliy ruwxıy qádiriyatlardı qádirlew hám izbe-iz rawajlandırıw jumıslarına joqarı dárejede itibar qarattı.

Atap ótilgenler menen bir qatarda, ekonomikalıq hám sociallıq wazıypalardı ámelge asırıwda sırt mámleketler hám xalıq aralıq strukturalar, sonday-aq, xalıq aralıq finans institutları menen hár tárepleme óz-ara birge islesiwdi kúsheytiw arqalı mámleketimizdiń milliy máplerine hám ekonomikalıq rawajlanıwına xızmet etetuǵın kelisimlerge erisiwde tikkeley basshılıq etti. 

2016-jıl 8-sentyabr kúni Ózbekstan Respublikası Oliy Majlisi Nızamshılıq palatası hám Senatınıń qospa májilisinde parlament palatalarınıń qospa qararına muwapıq Ózbekstan Respublikası Prezidentiniń wazıypaları menen wákilliklerin orınlaw waqtınsha Ózbekstan Respublikası Bas ministri Sh.M.Mirziyoevqa júklendi.

19-oktyabr kúni Tashkentte Isbilermenler háreketi - Ózbekstan Liberal-demokratiyalıq partiyasınıń VIII sezdi bolıp ótti. Onda Shavkat Miromonovich Mirziyoevtiń kandidaturasın Prezidentlikke tastıyıqlaw haqqında qarar qabıl etildi. 2016-jıl 4-dekabr kúni bolıp ótken Prezident saylawınıń juwmaqları boyınsha saylawshılardıń 88,61 procent dawısı menen Ózbekstan Respublikası Prezidenti etip saylandı. 2016-jılı 14-dekabrde rásmiy túrde óz wazıypasın atqarıwǵa kiristi.

2021-jıl 24-oktyabr kúni Prezident Shavkat Mirziyoev saylawshılardıń 80,1 procent dawısı menen ekinshi bes jıllıq múddetke qayta saylandı.

Sh.M.Mirziyoev shańaraqlı, eki qız, bir ul, altı aqlıǵı bar. Ómirlik joldası Z.M.Mirziyoeva - qánigeligi boyınsha injener-ekonomist

Sh.M.Mirziyoev mámleketlik hám basqarıw uyımlarındaǵı kóp jıllıq nátiyjeli miyneti, elimizdiń rawajlanıwı, xalqımızdıń abadanlıǵın arttırıw isine úlken úles qosqanı ushın "Mehnat shuhrati" hám "Fidokorona xizmatlari uchun" ordenleri menen sıylıqlanǵan.

Derek: Ózbekstan Respublikası Prezidentiniń rásmiy web-saytı