O‘zbеkistоn Rеspublikаsi Sоg‘liqni saqlash vаzirligi

Insonning ushbu murakkab a'zosi 100 milliard neyron va trillion hujayradan tashkil topgan. Bu ma'lumotlar Markaziy asab tizimi kasalliklari muolajasida miyaga tig'tekkizish naqadar murakkab amaliyot ekanligini anglatadi. 

 — Muassasamiz bolalar va kattalarda uchraydigan neyroxirurgik kasalliklarni diagnostika qilish va davolash bilan shug'ullanadi, — deydi Respublika ixtisoslashtirilgan neyroxirurgiya ilmiy amaliy tibbiyot markazi direktori G'ayrat Kariev.  

  — 130 o'ringa mo'ljallangan shifo maskanimizda qon tomirlari, bolalar, orqa va bosh miya neyroxirurgiyasi, periferik nervlar patologiyasi va reabilitasiyasi, neyroonkologiya, shoshilinch neyroxirurgiya kabi bo'limlar faoliyat yuritmoqda. Hududlarda 13 ta filialimiz tashkil etilgan. 

Bu erda shu yil birinchi yarmida jami 1,2 mingga yaqin operasiya o'tkazildi. Shundan qariyb 770 tasi yuqori texnologik jarrohlik amaliyotidir. Qolaversa, qator noyob va murakkab muolaja usullari ilk bor qo'llanildi. 

Xususan, robot-assistent va navigasiya tizimi yordamida bosh miyaning chuqur joylashgan hamda etib borish qiyin bo'lgan o'smalari olib tashlandi.

Og'ir shakldagi farmakorezistent epilepsiyasini aniqlash va kasallik o'chog'ini bartaraf etishda ham robot-assistentdan foydalanildi.

Misol uchun, shunday noyob amaliyotlardan biri 6 oylik chaqaloqda bajarildi. Jajji bemor ikki oyligidan boshlab doimiy tutqanoq xurujlaridan aziyat chekib kelgan. Bu holat takrorlanavergach, so'nggi paytlarda xushini yo'qotgan. 

Tibbiy amaliyotda o'ta murakkab va xavfli hisoblangan noyob operasiya muvaffaqiyatli o'tkazildi. Tutqanoq xurujlari to'xtadi. Chaqaloq sog'lom hayotga qaytdi. 

Yangi davolash va diagnostika usullarini o'zlashtirishda bolalar neyroxirurglari jamiyati, Xitoy, Yaponiya, Belarus, Qozog'iston singari davlatlarning etakchi neyroxirurglari bilan hamkorlik aloqalari qo'l keldi.

Ayni paytda markazning moddiy-texnik bazasini yanada mustahkamlash choralari ko'rilyapti. Bu esa tibbiyotning ushbu yo'nalishini yanada rivojlantirish va ixtisoslashgan xizmatni aholiga yanada yaqinlashtirish imkonini beradi.

Sog'liqni saqlash vazirligi
Matbuot xizmati.