E'tirof etilganidek, keyingi yillarda O'zbekiston va Turkmaniston o'rtasidagi hamkorlik izchil rivojlanmoqda. Bu borada esa davlatlarimiz etakchilari o'rtasida o'rnatilgan konstruktiv muloqot muhim ahamiyat kasb etayotir.

Buni tibbiyot yo'nalishidagi aloqalarimiz har tomonlama kengayib borayotgani ham yaqqol tasdiqlaydi.

Xususan, soha uchun kadrlar tayyorlash yo'nalishida buni ko'rish mumkin. Ayni paytda mamlakatimizdagi tibbiyot oliy o'quv yurtlarida 400 nafardan ziyod turkmanistonliklar ta'lim olmoqda.

Shu bilan birga, ikki davlat tibbiyot xodimlari ishtirokida turli tadbirlar muntazam o'tkazib kelinyapti. Masalan, 2024 yilda Toshkentda bo'lib o'tgan xalqaro oftalmologiya Kongressi doirasida Markaziy Osiyo mamlakatlari glaukomatologlari alyansi tuzilib, tegishli memorandum imzolandi.

Uchrashuvda O'zbekiston va Turkmaniston o'rtasidagi o'zaro hamkorlik doirasida sog'liqni saqlash sohasidagi munosabatlarni yanada kengaytirish bilan bog'liq hali ishga solinmagan imkoniyatlar mavjudligi ham ta'kidlab o'tildi.

Shundan kelib chiqib, uchrashuvda etuk tibbiyot kadrlarini tayyorlash va ilmiy salohiyatni yanada mustahkamlash, tegishli idoralar o'rtasida dori vositalari sifatini nazorat qilishni ta'minlash, dori-darmon sifatini baholash jarayonida axborot va tajriba almashish, tibbiyotda innovasion texnologiyani rivojlantirish platformasini yaratishga doir ilmiy-amaliy konferentsiya, forum, trening va master-klasslarni kengaytirishga alohida e'tibor qaratildi.

Muloqot davomida Turkmanistonning Arqadag'shahrida tashkil etilgan tibbiyot klasteri delegasiyasining mamlakatimizga kelishi, yurtimiz sog'liqni saqlash tizimi xodimlari va sohaga ixtisoslashgan tadbirkorlar bilan o'zaro hamkorlikni yo'lga qo'yish masalasi muhokama qilindi.

Yakunda O'zbekiston va Turkmaniston o'rtasidagi tibbiyot yo'nalishidagi aloqalarni yanada kengaytirishga kelishib olindi.

Shuningdek, elchi vazirlikda tashkil etilgan raqamli sog'liqni saqlash markazi faoliyati bilan ham tanishtirildi.