Xitoyda Shanxay hamkorlik tashkilotiga a’zo davlatlar madaniyat vazirlarining 22-yig‘ilishi bo‘lib o‘tdi
2025-07-14 10:20:00 / Yangiliklar

Tomonlar ShHT doirasida madaniy-gumanitar hamkorlikni rivojlantirishning hozirgi holati yuzasidan fikr almashdilar, ShHTga a’zo davlatlar hukumatlari o‘rtasida madaniyat sohasida hamkorlik to‘g‘risidagi Bitim (2007-yil 16-avgust, Bishkek) asosida ikki va ko‘p tomonlama hamkorlikni davom ettirishga kelishib oldilar.
“Ayni paytda ShHTga a’zo davlatlar o‘rtasidagi madaniy hamkorlik nafaqat do‘stlikni mustahkamlash, balki bir-birimizni hurmat qilish, tushunish, madaniy merosimizni asrab-avaylashda muhim ahamiyat kasb etmoqda. O‘zbekiston ShHTning madaniy loyihalarida faol ishtirok etib, madaniy hamkorlikni rivojlantirishga katta ahamiyat beradi. Mamlakatimiz ShHTga a’zo davlatlar bilan kino, teatr, musiqa, raqs, muzey va boshqa sohalarda madaniyat sohasida hamkorlik qiladi. “Madaniyat kunlari”ni tashkil etish, teatr gastrollari, muzeylar ko‘rgazmalari yaxshi an’anaga aylangan. Hurmatli hamkasblar! Madaniyat sohasidagi hamkorligimizni yanada rivojlantirish uchun katta imkoniyatlar mavjudligiga ishonamiz. Biroq, biz bu imkoniyatlardan to‘liq foydalanmayapmiz, deb hisoblaymiz. Bizga ma’lumki, ShHTga a’zo davlatlar aholisi uch milliarddan ortiq, ya’ni dunyo aholisining deyarli yarmini tashkil etadi. Bu ko‘rsatkich ko‘plab qo‘shma madaniy loyihalarni amalga oshirish zarurligini ko‘rsatadi. Bugun dunyoda ziddiyatlar ko‘payib borayotgan bir paytda tinchlik va barqarorlikni saqlashda aynan madaniyat muhim o‘rin tutadi. Endi barcha mamlakatlar uchun eng muhimi iqtisodiy rivojlanishdir, aholining o‘sishi esa energiya va resurslarga talabni oshiradi. Iqtisodiyot bilan birga milliy madaniyatni ham asrab-avaylash va rivojlantirish muhim. Xitoy misolida iqtisodiy taraqqiyotni madaniy qadriyatlarni saqlash va rivojlantirish bilan muvaffaqiyatli uyg‘unlashtirish mumkinligini ko‘rsatadi” – dedi vazir Ozodbek Nazarbekov yig‘ilishdagi nutqi davomida.
Yig‘ilishda ShHT Bosh kotibi Nurlan Ermekbayev ShHT doirasida madaniy loyihalar xalqlarni bir-biriga yaqinlashtirish, ishonch va o‘zaro hamjihatlikni mustahkamlash, tinchlik va yaxshi qo‘shnichilik g‘oyalarini ilgari surish platformasiga aylanib borayotganini ta’kidladi. Shu nuqtai nazardan, gumanitar aloqalarni kengaytirish va ShHT tashabbuslarini jamoatchilik tomonidan qo‘llab-quvvatlashda muhim ahamiyat kasb etayotgan Xitoy, Qirg‘iziston Respublikasi, Rossiya, Tojikiston va O‘zbekistondagi xalq diplomatiyasi institutlari faoliyati alohida ta’kidlandi.
Yig‘ilish ishtirokchilari oldida so‘zga chiqqan Bosh kotib ShHTning barcha mexanizmlari samaradorligini oshirish bo‘yicha Davlat rahbarlarining topshiriqlarini qayd etdi va tomonlarni madaniyat sohasidagi amaliy loyihalarni ko‘paytirishga chaqirdi. Xulosa o‘rnida Nurlan Ermekbayev tomonlarga ShHTning madaniyat sohasida qabul qilingan hujjatlarini hayotga tatbiq etish, kelishuvni amaliyotga joriy etishni jadallashtirish, madaniy merosni asrab-avaylashning dolzarb masalalari bo‘yicha qo‘shma tadbirlar o‘tkazishga qaratilgan qator tashabbuslarni taklif etdi.
Uchrashuv yakunlari bo‘yicha tomonlar protokol imzoladilar va “2025-yilga mo‘ljallangan ShHT doirasidagi madaniy almashinuv tadbirlari ro‘yxati”ni tasdiqladilar.
Ma’lumot uchun, SHHTga a’zo davlatlar badiiy jamoalari ishtirokida qo‘shma konsert dasturi bo‘lib o‘tishi rejalashtirilgan.