“Shahrisabz” turistik markazida tadbirkorlik faoliyati uchun yer uchastkalari auksion savdolariga chiqarildi
2024-03-29 15:50:00 / Vazirlik yangiliklari

Auksion savdolariga chiqarilgan lotlarning faoliyat turi Turistik markazda zamonaviy xizmat ko‘rsatish majmualari va turizm infratuzilmasi obyektlari, jumladan, mehmonxonalar, mehmon uylari, sog‘lomlashtirish, savdo-ko‘ngilochar markazlardan iborat.
E’tiborli jihati, O‘zbekiston Respublikasi Prezidentining 2023-yil 28-noyabrdagi PQ-376-sonli Qaroriga muvofiq, auksion savdolarida qatnashib, g‘olib deb topilgan tadbirkorlarda umumiy to‘lovni 10 yil mobaynida bo‘lib to‘lash imkoniyati mavjud.
Shuningdek, “Shahrisabz” turistik markazini obodonlashtirish va ko‘kalamzorlashtirish maqsadida auksion savdolariga chiqarilgan lotlarni bog‘lovchi “Oq daryo” bo‘ylab 10 km zamonaviy velo va piyodalar yo‘lagi qurilish ishlari boshlandi.
Shahrisabz tumani infratuzilmasini rivojlantirish va tashrif buyuruvchilarga qulay sharoitlar yaratish maqsadida hududda o‘tgan ikki yil mobaynida bir qator qurilish ishlar amalga oshirildi. Jumladan, 110 mlrd so‘m budjet mablag‘lari hisobidan 126 km avtomobil yo‘li ta’mirlandi, 10 km ichimlik suvi tarmog‘i va 84 km elektr tarmog‘i tortildi, 16 ta transformator o‘rnatildi, 5,1 km oqova suv tarmog‘i hamda 1000 m³ sig‘imli suv tozalash inshooti qurilib foydalanishga topshirildi.
Auksion savdolariga chiqarilgan lotlar bilan quyidagi havola orqali tanishish mumkin.
Iqtisodiyot va moliya vazirligi
Axborot xizmati