Uchrashuvda tomonlar oliy taʼlim sohasidagi hamkorlikning bugungi holati va uni rivojlantirishning istiqbolli yoʻnalishlari yuzasidan fikr almashdilar.

Qoʻngʻirotboy Sharipov ikki mamlakat oʻrtasida oliy taʼlim yoʻnalishidagi munosabatlar muvaffaqiyatli rivojlanayotganini taʼkidladi. U mamlakatimizda faoliyat yuritayotgan 4 ta Janubiy Koreya universitetlari filiallari, koreys tili va adabiyoti boʻyicha tayyorlanayotgan mutaxassislar, 180 nafardan ortiq talaba tahsil olayotgan qoʻshma taʼlim dasturlari, shuningdek, talabalarning oʻzaro akademik mobilligi haqida toʻxtaldi. 

Muloqotda transport, mashinasozlik, arxitektura, geologiya, qayta tiklanadigan energiya manbalari, “yashil iqtisodiyot” va kasb-hunar taʼlimi sohalarida hamkorlikni kengaytirish, Janubiy Koreya universitetlaridan mutaxassislarni jalb etish, ilmiy-amaliy markazlar, texnoparklar tashkil etish kabi yoʻnalishlarda loyihalarni amalga oshirish yuzasidan takliflar bildirildi.

Shuningdek, Koreya xalqaro hamkorlik agentligi (KOICA) bilan koʻngilli oʻqituvchilarni jalb qilish va taʼlim sohasida qoʻshma loyihalarni rivojlantirishga doir masalalar muhokama qilindi.

Uchrashuvda tomonlar muhandislik va axborot texnologiyalari sohalari bo‘yicha e’lon qilingan xalqaro grant dasturida o‘zbekistonlik talabalar ishtirokini yanada kengaytirish, ularning ushbu imkoniyatlardan samarali foydalanishini ta’minlash maqsadida amaliy chora-tadbirlarni belgilab oldilar. Shu doirada, oliy ta’lim muassasalari bilan hamkorlikni mustahkamlash, talabalarni xabardor qilish, zarur metodik ko‘mak berish va ularni tayyorlash jarayonlarini tizimli yo‘lga qo‘yish masalalariga alohida e’tibor qaratildi.

Shu bilan birga, muhandislik va texnik yoʻnalishlar boʻyicha oʻzbekistonlik talabalar uchun Janubiy Koreya universitetlarida stipendiyalar ajratish imkoniyatlarini oʻrganish taklifi ham ilgari surildi.

Tomonlar ushbu muloqotni amaliy hamkorlikka aylantirish boʻyicha aniq chora-tadbirlarni belgilab, oʻzaro aloqalarni yanada faollashtirishga kelishib oldilar.