Oliy taʼlim, fan va innovatsiyalar vazirligida JICA tadqiqot guruhi bilan uchrashuv boʻlib oʻtdi
2025-07-25 15:05:00 / Vazirlik yangiliklari
Uchrashuvda JICAning Yaponiyadagi markaziy ofisi – Sharqiy, Markaziy Osiyo va Kavkaz departamenti direktori birinchi oʻrinbosari Yuka Sonoyama hamda ushbu departamentning Oʻzbekiston boʻyicha masʼul xodimi Shunichi Matsuda onlayn tarzda ishtirok etdi.
Muzokaralar chogʻida JICA prezidenti A.Tanakaning joriy yildagi Oʻzbekistonga tashrifi davomida erishilgan kelishuvlar asosida amalga oshirilayotgan “Yoʻl xaritasi”ning ustuvor yoʻnalishlari muhokama qilindi. Xususan, muhandislik kadrlarini tayyorlashni rivojlantirish va sanoatni modernizatsiya qilish uchun zarur boʻlgan yuqori malakali kadrlar bazasini kengaytirishga qaratilgan istiqbolli loyiha konsepsiyasi yuzasidan fikr almashildi.
Uchrashuv davomida JICA tadqiqot guruhi rahbari Eichi Imamura “Sanoatni modernizatsiya qilish uchun zarur boʻlgan yuqori malakali kadrlar bazasini kengaytirish” loyihasi boʻyicha taqdimot oʻtkazdi. Taqdimotning muhokamasi jarayonida Sh. Daliyev tomonidan loyihani yanada samarali amalga oshirishga qaratilgan bir qator aniq takliflar ilgari surildi. Jumladan, oliy taʼlim muassasalarini zamonaviy laboratoriya uskunalari bilan taʼminlash, ushbu uskunalardan oqilona va samarali foydalanish koʻnikmalarini shakllantirish, ilmiy va muhandislik salohiyatiga ega kadrlarni maqsadli tayyorlash va ularni qayta tayyorlash masalalari muhokama etildi.