Dastlab Farg‘ona shahar 1-son politexnikumiga borib, “Dolzarb 90 kun” dasturi doirasida o‘tkazilayotgan ko‘rik-tanlovlar, sport to‘garaklari va boshqa ijtimoiy-ma’naviy tadbirlar bilan tanishdi. Shuningdek, u Lolaxon Murotova nomidagi qishloq xo‘jaligiga ixtisoslashgan texnikumda mavjud loyihalar, o‘quv-amaliy mashg‘ulotlar va yangi tashabbuslarni o‘rgandi.

Shu kuni Sarvarxon Buzrukxonov Quva tuman politexnikumiga ham tashrif davom ettirib, O‘zbekiston Respublikasi Prezidentining 2025-yil 1-apreldagi PQ-131-son qarorida belgilangan vazifalar ijrosi holatini ko‘zdan kechirdi. Mazkur texnikumda 7 ta zamonaviy kasbga o‘qitish markazi, IT va xorijiy tillarni o‘qitish bo‘yicha infratuzilma yaratish ishlari olib borilayotgani qayd etildi. Shu bilan birga, budjetdan tashqari mablag‘ topish maqsadida mebelchilik va payvandchilik bo‘yicha qisqa muddatli o‘quv kurslari yo‘lga qo‘yilgan.

Xizmat safari yakunida Farg‘ona sanoat va xizmat ko‘rsatish texnikumida olib borilayotgan qurilish-ta’mirlash ishlari hamda Angliyaning Pearson xalqaro ta’lim tashkiloti bilan hamkorlikda xalqaro ta’lim dasturini joriy etish jarayonlari o‘rganildi. Ushbu loyiha O‘zbekiston Respublikasi Prezidentining 2024-yil 16-oktyabrdagi PF-158-son farmoniga muvofiq amalga oshirilmoqda.

Vazir o‘rinbosari mazkur obyektlarda amalga oshirilayotgan ishlarni ijobiy baholadi hamda mavjud imkoniyatlardan samarali foydalanish, ta’lim sifatini oshirish, infratuzilmani yangilash borasida tegishli rahbarlarga ko‘rsatma va tavsiyalar berdi.