O‘zbekiston Respublikasi Raqamli texnologiyalar vazirligi

Forumda davlat va nodavlat tashkilotlar rahbarlari, xalqaro ekspertlar, yirik korporatsiyalar va jamoatchilik vakillari ishtirok etib, raqamlashtirishning mamlakat taraqqiyotidagi o‘rni, erishilgan natijalar hamda yangi avlod texnologiyalari asosida kelajakka qadam qo‘yish masalalarini muhokama qilishdi.

So‘nggi yillarda O‘zbekistonda raqamli hukumat sohasida qator ishlar amalga oshirildi:

• Davlat tashkilotlarida qog‘ozbozlik keskin qisqartirildi, byurokratik to‘siqlar bartaraf etildi.

• Ma’lumotlar bazalari standartlashtirilib, idoralar axborot tizimlari o‘zaro integratsiya qilindi.

• Yagona interaktiv davlat xizmatlari portali (my.gov.uz) orqali ko‘rsatilayotgan xizmatlar soni 780 taga yaqinlashdi.

• OneID tizimiga 765 dan ortiq axborot tizimlari ulandi, fuqarolarning vaqt sarfi 90 foizgacha kamaydi.

• Davlat xizmatlari ochiq API orqali xususiy ilovalarga integratsiya qilindi.

• Bugungi kunda 150 dan ziyod xususiy platforma orqali davlat organlari ma’lumotlaridan 130 million marotaba foydalanildi.

• “O‘zbekiston — 2030” strategiyasi doirasida “Raqamli hukumat” dasturi bo‘yicha joriy yilda 60 dan ortiq ustuvor loyiha amalga oshirilishi rejalashtirilgan, ularning 30 tasi ishga tushirildi.

2030-yilga qadar barcha davlat xizmatlarini to‘liq onlayn shaklga o‘tkazish, 2027-yil oxiriga qadar 40 ga yaqin proaktiv va kompozit xizmatlarni joriy etish rejalashtirilgan.

Shu bilan birga, quyidagi texnologiyalardan samarali foydalanish ko‘zda tutilmoqda:

• Sun’iy intellekt yordamida murojaatlarga javob berish vaqti 30–40 foizga qisqartiriladi.

• Blokcheyn texnologiyasi orqali hujjatlar ishonchliligi oshiriladi.

• Smart City va Green Tashkent loyihalari orqali shahar infratuzilmasi barqaror rivojlantiriladi.

Forum doirasida Raqamli hukumatning yangi avlod modeli taqdim etildi. Shuningdek, Adliya vazirligi, Oliy ta’lim, fan va innovatsiyalar vazirligi, Toshkent shahar hokimligi hamda “Aloqabank” vakillari raqamli transformatsiya natijalarini ma’lum qilishdi.

Xalqaro ekspertlar ham o‘z tajribalari bilan o‘rtoqlashishdi. Sun’iy intellekt, blokcheyn, big data kabi ilg‘or texnologiyalarni joriy etish bo‘yicha istiqbolli rejalar muhokama qilindi.

Forum yakunida raqamlashtirishda yuqori natijalarga erishgan davlat idoralari turli nominatsiyalar bo‘yicha taqdirlandi.