O‘zbekiston Respublikasi Prezidentining “Respublikaning hudud, soha va tarmoqlarida raqamli texnologiyalar joriy etilishini yanada jadallashtirish chora-tadbirlari to‘g‘risida”gi (PQ–286-son, 16.09.2025) qarori qabul qilindi.

Qaror  “Raqamli O‘zbekiston – 2030” strategiyasiga muvofiq, shuningdek, davlat organlari va iqtisodiyotning real sektori korxonalarining faoliyatini raqamli transformatsiyalash, ko‘rsatilayotgan elektron xizmatlar ko‘lamini kengaytirish, hududlarda raqamli texnologiyalarni yanada rivojlantirish maqsadida  qabul qilindi.

Qaror bilan “Raqamli hukumat” tizimini 2025–2026-yillarda rivojlantirishning ustuvor yo‘nalishlari etib quyidagilar belgilandi:

– “Raqamli hukumat” dasturi doirasida 41 ta ustuvor loyihani ishga tushirish, elektron davlat xizmatlari ulushini 70 foizga yetkazish hamda mahallalarda 30 dan ortiq davlat xizmatlarini ko‘rsatish;

– hududlarda telekommunikatsiya infratuzilmasini rivojlantirish, jumladan, 66 ming km optik tolali aloqa liniyasini o‘tkazish, 2 284 ta tayanch stansiyani ishga tushirish, 100 dan ortiq axborot tizimini joriy etish;

– aholi va tadbirkorlar uchun 100 dan ortiq elektron xizmatlarni joriy etish, shu jumladan, 10 turdagi davlat xizmatini proaktiv va kompozit shaklga o‘tkazish, 19 ta hayotiy vaziyatda fuqarolarga avtomatik tarzda xabar yuborish.

Shuningdek, 2025-yil 1-noyabrdan boshlab kiberxavfsizlik talablariga rioya etgan holda mobil aloqa operatorlari, tijorat banklari va to‘lov tashkilotlariga mobil ilovalar orqali Yagona interaktiv davlat xizmatlari portalida pulli elektron davlat xizmatlarini taqdim etish imkoniyati yaratiladi.

Shu bilan birga, 2025-yil 1-dekabrdan boshlab nodavlat notijorat tashkilotlariga “Raqamli hukumat” tizimining Idoralararo integratsiyalashuv platformasi orqali elektron idoralararo hamkorlikni amalga oshirishga ruxsat beriladi.

2026-yil 1-yanvardan boshlab esa fuqarolarning ijtimoiy yordam ko‘rsatish bo‘yicha murojaati, mahallalarda oilalar va aholi ma’lumotlarini yuritish, aholi bilan ishlash jarayonlari “Raqamli mahalla” platformasi orqali amalga oshiriladi.

Mahalla va manzillarni yuritishda yagona yondashuv joriy etiladi. Shu maqsadda Raqamli texnologiyalar vazirligi va O‘zbekiston mahallalari uyushmasi hamkorligida 2025-yil 15-oktabrga qadar mahalla fuqarolari yig‘inining yagona identifikatori sifatida kadastr raqamini qo‘llagan holda “Raqamli hukumat” tizimining Mahallalarning markazlashgan reyestri ishga tushiriladi.

2025-yil 1-noyabrdan boshlab Mahallalarning markazlashgan reyestri davlat organlari va tashkilotlarining “Raqamli hukumat” tizimi bilan integratsiyalashgan axborot tizimlari va resurslarida majburiy tarzda qo‘llanilishi belgilanmoqda.

Kadastr agentligi 2026-yil 31-dekabrga qadar ko‘chmas mulk obyektlarining barcha ma’lumotlarini “UZKAD” axborot tizimiga o‘tkazilishini, shuningdek, geodeziya koordintalariga (WGS-84) bog‘langan yagona davlat manzil reyestrining shakllantirilishi belgilandi.

Sog‘liqni saqlash sohasida 2026-yil 1-maydan boshlab nogironlikni belgilash (bolalikdan nogironligi bo‘lgan, I va II guruh nogironlari) bo‘yicha davlat xizmatini ko‘rsatishda fuqarolarga tibbiyot muassasalariga imtiyozli davolanish uchun beriladigan yo‘llanmani shakllantirish va elektron navbatga qo‘yish kompozit shaklda amalga oshiriladi.

Shuningdek, 2026-yil yakuniga qadar “Raqamli sog‘liqni saqlash platformasi”ga integratsiyalashgan, tibbiy ko‘rik jarayonida shifokor nutqini avtomatik ravishda bayonlashtiruvchi ovozli yordamchi hamda bemorlarga tashxis qo‘yishda shifokorga ko‘maklashuvchi sun’iy intellekt texnologiyalariga asoslangan “Shifokorning raqamli yordamchisi” dasturi ishga tushiriladi.

Ta’lim sohasida 2025-yil 1-noyabrdan boshlab davlat oliy ta'lim muassasalari talabalariga oylik ijara to‘lovining bir qismini qaytarish bo‘yicha Yagona portal orqali murojaat qilish imkoniyati yaratiladi. 2026-yil 1-yanvardan boshlab o‘rta maxsus, kasbiy va oliy ta’lim tashkilotlarida davlat xizmatlarini Yagona portal orqali ko‘rsatish yo‘lga qo‘yiladi.

Suv xo‘jaligi sohasida 2025-yil 1-noyabrdan fermer va dehqon xo‘jaligi hamda tadbirkorlik subyektlariga suv taqsimlash bilan bog‘liq barcha ma'muriy tartib-taomillar “Suv hisobi” suv resurslarini boshqarish yagona tizimi orqali faqat elektron shaklda amalga oshiriladi.

2025-yil 1-noyabrdan boshlab transport vositasiga gaz baloni o‘rnatilganligiga oid ma'lumotlarni elektron shaklda yuritish orqali transport vositasini ro‘yxatdan o‘tkazish guvohnomasini qayta rasmiylashtirish tartibi bekor qilinadi.

2026-yil 1-yanvardan boshlab Yagona portal orqali chet el fuqarolari va fuqaroligi bo‘lmagan shaxslarni yashash joyi bo‘yicha bir yilgacha bo‘lgan muddatga vaqtincha ro‘yxatga olish amaliyoti joriy etiladi.

Shuningdek, Raqamli texnologiyalar vazirligi Istiqbolli loyihalar milliy agentligi bilan birgalikda 2026-yil 1-dekabrga qadar ta’lim, sog‘liqni saqlash va sug‘urta sohalarida ma’lumotlarning taqsimlangan reyestri texnologiyasini joriy etadi.

Qarorga muvofiq, 2026-yil 1-dekabrga qadar, jumladan, quyidagi imkoniyatlarga ega “Raqamli hukumat” tizimining “OASIS” (O‘zbekiston axborot sistemalarining integratsion servisi) yagona raqamli platformasini ishlab chiqiladi.

Bu orqali:

– davlat axborot tizimlarini yaratish va rivojlantirishda yagona texnologik yondashuv ta’minlanadi;

– modullarga asoslangan texnologiyalar yordamida axborot tizimlarini yaratish jarayonlari maqbullashtiriladi;

– davlat axborot tizimlarining moslashuvchanligi, xavfsizligi va samaradorligi oshiriladi.

2025-yil 1-noyabrdan “Raqamli startaplar” dasturi va Markaziy bankning “tartibga solish qumdoni”da ishtirok etuvchi loyihalarga “Raqamli hukumat” tizimining Raqamli ma’lumotlar platformasidan axborot xavfsizligi talablari va belgilangan tartibga rioya qilgan holda bir yil muddatga qadar bepul foydalanish imkoniyati taqdim etiladi.

Shuningdek, xorijdagi diplomatik vakolatxonalar (konsullik) O‘zbekiston konsulliklari orqali IT Park rezidentlari mutaxassislariga masofadan turib bank hisobvaraqlari va onlayn bank kartalarini ochishga ruxsat beriladi.

O‘zbekiston Respublikasining xorijdagi diplomatik vakolatxonalari (konsullik muassasalari) orqali jismoniy shaxsning shaxsiy identifikatsiya raqamini olgan IT-park rezidentlarining xorijiy mutaxassislari uchun masofadan turib bank hisobvaraqlari hamda onlayn bank kartalarini ochishga ruxsat beriladi.

2026-yil 1-yanvardan boshlab IT Park rezidentlariga quyidagilarga ruxsat etiladi:

– reklama xizmatlari va dasturiy ta’minotdan foydalanishga bo‘lgan obunalar uchun korporativ bank kartalari orqali to‘lovlarni kalendar yil davomida eksport tushumlari doirasida, biroq 500 ming AQSh dollaridan ko‘p bo‘lmagan miqdorda amalga oshirish. Bunda:

– reklama Investitsiyalarni jalb qilish, sanoatni rivojlantirish va savdoni tartibga solish masalalari bo‘yicha Hukumat komissiyasi tomonidan tasdiqlangan ro‘yxatga kiritilgan 100 milliondan ortiq auditoriyaga ega axborot resurslari va tizimlari (shu jumladan, veb-saytlar, platformalararo resurslar, messendjerlar va ijtimoiy tarmoqlar)da joylashtirilishi talab etiladi;

– reklama xizmatlari va dasturiy ta'minotdan foydalanish obunasi bo‘yicha ommaviy oferta va invoyslar, shuningdek, to‘lovlar to‘g‘risidagi ma'lumotlar “E-contract” tashqi savdo axborot tizimiga kiritiladi.

– umumiy summasi 5 ming AQSh dollarigacha bo‘lgan ommaviy oferta, invoys va to‘lovlar to‘g‘risidagi ma’lumotlar “E-contract” tashqi savdo axborot tizimiga kiritilishi talab etilmaydi hamda ushbu xarajatlar debitorlik qarz sifatida hisobga olinmaydi.

Shuningdek, yaratgan dasturiy mahsuloti obunasi uchun xorijiy davlatlardan kelib tushadigan to‘lovlarni “E-contract” tashqi savdo axborot tizimiga kiritmagan holda ommaviy oferta orqali qabul qilish mumkin bo‘ladi.