Samarqandda sun’iy intellekt texnologiyalarining ta’lim, inson kapitali va ijtimoiy sohalardagi roli muhokama qilindi
2025-08-07 22:55:00 / Vazirlik yangiliklari
Samarqand shahrida bo‘lib o‘tayotgan “Mustaqil Davlatlar Hamdo‘stligi mamlakatlarida sun’iy intellekt texnologiyalarini rivojlantirish” mavzusidagi xalqaro forum doirasida panel sessiyalari davom etdi. 3-sessiyada sun’iy intellektning ta’lim tizimini transformatsiya qilishdagi, inson kapitali salohiyatini rivojlantirishdagi hamda ijtimoiy muammolarni hal etishdagi roli keng muhokama etildi.
Sessiyada ta’lim sohasidagi rahbarlar, texnologik markazlar va xususiy sektor vakillari ishtirok etib, sun’iy intellekt orqali ta’lim sifatini oshirish, raqamli va ijtimoiy tengsizlikni kamaytirish, zamonaviy mutaxassislarni tayyorlashda intellektual texnologiyalarning ta’siri haqida o‘z tajribalari va yondashuvlari bilan o‘rtoqlashishdi.
Forum ishtirokchilari ta’lim sohasida personallashtirilgan o‘qitish, avtomatlashtirilgan tahlillar hamda o‘rganish modellarini joriy etishda sun’iy intellekt yechimlari katta imkoniyatlar yaratayotganini ta’kidlashdi. Shuningdek, ijtimoiy sohalarda, jumladan, sog‘liqni saqlash, ish bilan ta’minlash, aholi ehtiyojlarini tahlil qilishda sun’iy intellekt texnologiyalaridan foydalanish imkoniyatlari atroflicha ko‘rib chiqildi.
Xalqaro forum doirasida to‘rtinchi sessiya “Sun’iy intellekt mahsulotlari bozorini shakllantirish: eksperimentlardan barqaror biznes-modellarga” mavzusida o‘tkazildi.
Sanoat ekspertlari, startap rahbarlari va IT kompaniyalar vakillari ishtirok etgan mazkur sessiyada SI amaliy yechimlarining bozorda o‘z o‘rnini topishi uchun zarur sharoitlar muhokama qilindi. Xususan, uni qo‘llab-quvvatlashi, investitsiyalar, ma’lumotlarga kirish imkoniyati, huquqiy baza va standartlashtirish kabi omillarga alohida e’tibor qaratildi.
Tadbir davomida mutaxassislar SI loyihalarini tijoratlashtirishda uchraydigan muammolar, yangi platformalar va xizmatlarni rivojlantirish strategiyalari hamda startap ekotizimlari uchun barqaror daromad modellari yaratish bo‘yicha amaliy tavsiyalar bilan o‘rtoqlashishdi.
Mazkur Forum Artificial Intelligence Journey (AIJ), IT Park, Huawei, Yandex, DataVolt kompaniyalari hamkorligida tashkil etildi.