“InfoTeach — 2025” Respublika informatika fani oʻqituvchilari forumi ochilish marosimi boʻlib oʻtdi
2025-08-04 18:35:00 / Vazirlik yangiliklari
Toshkent shahrida “InfoTeach–2025” Respublika informatika va axborot texnologiyalari fani o‘qituvchilari forumi boʻlib oʻtdi. Ushbu forum O‘zbekiston Respublikasi Raqamli texnologiyalar vazirligi, Maktabgacha va maktab taʼlimi vazirligi va Raqamli ta’limni rivojlantirish markazi hamda hamkor tashkilotlar tomonidan tashkil etildi. Forumda Raqamli texnologiyalar vaziri oʻrinbosari Rustam Karimjonov va Maktabgacha va maktab taʼlimi vaziri oʻrinbosari Sardor Rajabovlar ishtirok etdi.
Informatika oʻqituvchilari nafaqat dars beruvchi, balki o‘quvchilarni kelajakda global IT mehnat bozorida muvaffaqiyat qozonishga tayyorlovchi, yo‘l ko‘rsatuvchi sarbon sifatida maydonga chiqmoqda. Hozirda O‘zbekistondagi 10 mingdan ortiq maktablarda tahsil olayotgan 6,5 million o‘quvchiga atigi 17 mingga yaqin informatika o‘qituvchisi ta’lim berib kelmoqda. Bu esa raqamli transformatsiyani boshqarishda o‘qituvchilarning kasbiy tayyorgarligiga nisbatan yuksak talabni yuzaga keltirmoqda. “InfoTeach–2025” aynan shu muammolarga yechim berish maqsadida tashkil etildi.
Forum davomida treninglar, mahorat darslari, amaliy mashg‘ulotlar va ekspertlar bilan muhokamalar orqali o‘qituvchilarning kasbiy tayyorgarligi yangi bosqichga ko‘tarildi. Forumning asosiy maqsadi informatika fani o‘qituvchilarining ehtiyojlaridagi bo‘shliqlarni to‘ldirish orqali ularning zamonaviy texnologiyalar bilan ishlash salohiyatini oshirish, metodik qo‘llab-quvvatlash orqali innovatsion ta’lim jarayonlarini shakllantirish, hamda o‘quvchilarga IT sohasida muvaffaqiyat qozonish imkonini beruvchi bilim va ko‘nikmalarni singdirishda o‘qituvchilarning rolini mustahkamlashdir.
Tadbir doirasida darsliklar asosida samarali dars tashkil etish, onlayn platformalar bilan ishlash, sun’iy intellekt imkoniyatlaridan foydalanish, media savodxonlik va axborot xavfsizligini o‘rgatish kabi yo‘nalishlarda mashg‘ulotlar o‘tkaziladi.
Uch kun davom etadigan “InfoTeach–2025” Respublika forumida mamlakatimizning barcha hududlaridan jami 210 nafar oʻqituvchi ishtirok etdi. Forum yakunida ular o‘z bilimlarini amaliyotga tatbiq etish orqali o‘quvchilarni raqamli dunyoda muvaffaqiyatga yetaklaydigan yetuk kadrlar sifatida maydonga chiqarish uchun zarur bilimlarga ega boʻlishadi.
Maʼlumot oʻrnida 2025-yil davomida hududlarda jami 8 ta “InfoTeach” forumlari oʻtkazildi hamda 6000 dan ortiq informatika fani oʻqituvchilari malakasi oshirildi.